Samyo ng Pasko

Malamig na simoy ng hangin, dumarampi,

Sa pisngi’t sa balat ay namamalagi

Hindi mawawaglit, hindi maitatanggi;

Ang samyo ng Pasko, parating ng muli!

Liwanag ng parol sa kakalsadahan

Liwanag na tanglaw sa dilim ng kagabihan;

Mga batingaw – himig Pasko- nag-aawitan

Tradisyunal na karoling, atin ulit mauulinigan.

Habang si Nanay ay nagbabalot ng regalo,

Sa mga batang, bibisita’t hihingi ng aguinaldo

At si Tatay naman abala sa pagluluto

Upang mamaya’y may mapagsaluhan sa bisperas ng Pasko.

Hinihintay niyo ba na si Santa Claus ay dumating?

Ang nakapulang lalaki, pasalubong ang dating,

Ngunit ‘di ba, may mas mahalagang pagtutuunan ng pansin

Ang kapanganakan sa sabsaban ng Panginoon natin?

Sa munting bayan ng Bethlehem,isinilang

Ang sanggol na magliligtas sa buong sambayanan

Tatlong Haring Mago, sa kanya’y bumisita man,

Upang magbigay puri sa hari ng sanlibutan.

Nawa’y isapuso natin, tunay na diwa ng Pasko

Buhayin at pag-alabin ang diwa sa ating puso

Ang araw ng pagsilang ng Hari ng mundo

Ang pag-aalala sa araw sa Pasko ng mga Pilipino